அற்பனுக்கு பவுசு..

இந்த Tide என்று ஒரு பொருள் கேள்விப்பட்டு இருக்கிறீங்களா? அதாவது துணிகள்  தோய்க்க பயன்படும் சோப்பு. இது திரவ வடிவிலும், பவுடர் வடிவிலும் கிடைக்கிறது. இது தவிர கலர் கொடுக்க பயன்படும் மார்க்கர்ஸ் போன்றும் கடைகளில் கிடைக்கிறது. நீங்கள் நல்லா மெனக்கெட்டு ட்ரெஸ் பண்ணி பார்ட்டிக்கு போறீங்கள் என்று வைத்துக் கொள்ளுங்கள், போகும் வழியில் ஆடையில்  கறை அல்லது அழுக்கு பட்டா எரிச்சல் வரும். அப்போ இந்த டைட் மார்க்கரை மேலே லேசாக பூசினால் கறை இருந்த இடம் தெரியாமல் போய்விடும். இதெல்லாம் டிவியில் பார்த்த விளம்பரம். மற்றும்படி நான் இதெல்லாம் வாங்கியதில்லை. பார்ட்டிக்கு போகும் போது அழுக்குபட்டாலும் கலங்காத பரம்பரை எங்களுடையது. இந்த டைட் சோப்பு பிரபலம் ஆக காரணம். அதன் தரம். இதில் தோய்த்தால் ஆடைகள் பளிச் தான்.

ஊரில் இருந்த போது சன்லைட் சோப்போ அல்லது மூன்லைட்டோ ஏதோ ஒரு சோப்பினை ஆடையினை விரித்து வைத்து, சோப்புக் கட்டியினை இந்த மூலையிலிருந்து அந்த மூலைக்கு ஒரு இழுவை இழுத்து, தண்ணியில் அலசி, கொடியில் காயப்போட்டால் வேலை முடிந்தது.
இந்தியாவில் தண்ணீர் வித்யாசம் காரணமாக எந்த சோப்பும் வேலைக்கு ஆகவில்லை. அப்போது தான் என் அப்பா முதன் முறையாக டைட் பொடி வாங்கி வந்தார்கள். சூப்பரான மணம், தரம். அதன் பிறகு டைட் எங்கள் குடும்ப அங்கத்தினர் போல ஆகிப்போனார். கிட்டத்தட்ட 12 வருடங்கள் டைட் தான் எப்போதும் வாங்குவோம்.
அமெரிக்கா வந்த பிறகு டைட் திரவ வடிவில் வாங்கினாலும், எகிறும் அதன் விலை கண்டு வேறு ப்ராண்டுகள் வாங்கி ஆடைகள் தோய்ப்பதுண்டு. அதுவும் ஒரு குட்டி ( 8 தடவை தான் ஆடைகள் தோய்க்க முடியும் என்று கொட்டை எழுத்துக்களில் போட்டிருந்தாலும் ) காலனின் விலை பத்து டாலர்களுக்கு மேல். இப்படி வாங்கி, ஆடைகள் தோய்க்க கட்டுபடியாகுமா? எனவே  வேறு பக்கம் திரும்ப வேண்டியதாகிவிட்டது.
எல்லோரும் என்னைப்போல் மனதை சமாதானப்படுத்தி வேறு பக்கம் திரும்பவில்லையாம். எப்படி என்கிறீர்களா? கடைகளில் களவு போகும் பொருட்களில் இது முன்னணியில் இருக்கும் பொருளாம். இதை திருடி வெளியில் குறைந்த விலைக்கு விற்கிறார்களாம் சிலர். கடைகளில் உஷாராகி, இந்தப் பொருட்களை ஷோகேஸில் வைச்சு பூட்டி இருக்கிறார்கள். சவரம் செய்யப்பயன்படும் ஷேவிங்செட் வரிசையில் இதுவும் இப்ப ஷோகேஸில். உங்களுக்கு கட்டாயம் வாங்கி ஆகவேண்டும் எனில் கடையில் வேலை செய்பவர்களிடம் போய் கேட்க வேண்டும்.
போன கிழமை நான் கடைக்கு போனபோது இந்த பொருள் சேல் போட்டிருந்தார்கள். 50% தள்ளுபடி. வாங்கலாமா வேண்டாமா? என்று கொஞ்ச நேரம் யோசனை செய்த பின்னர் கடையில் வேலை செய்யும் அக்காவிடம், அதை எடுத்து தாங்கள் ப்ளீஸ், என்றேன். இடுப்பில் பத்திரமாக இருந்த சாவியை எடுத்து, கவனமாக திறந்து,கைகளை நீட்டிக் கொண்டு நின்ற என்னிடம் கொடுக்காமல், ஒரு கையால் பிடித்துக் கொண்டே, மறு கையால் ஷோகேஸினை பூட்டி, அதனை இரண்டு தரம் இழுத்துப் பார்த்துவிட்டு, ஒரு வெற்றிச் சிரிப்பு சிரித்தார். சரி, அதைக் இப்படிக் கொடுங்கள் என்றேன்.
இல்லை பரவாயில்லை. நானே கவுன்டர் வரை கொண்டு வருகிறேன், என்று சொன்னதோடு நில்லாமல் கவுன்டர் வரை கொண்டு வந்து, அவரே பில்லும் போட்டு, ரசீதை என் கையில் கொடுத்த பிறகு தான் டைட் பாட்டிலை என்னிடம் கொடுத்தார். நான் அதற்கு கொடுத்த விலை $5. ஆனால், ஒபாமா ரேஞ்சுக்கு அவ்வளவு பாதுகாப்பு இந்தப் பொருளுக்கு.

எங்க அம்மாச்சி சொல்வார்கள், அற்பனுக்கு பவுசு வந்தால் அர்த்த ராத்திரியில் குடை பிடிப்பானாம், என்று.

இப்படி Tide திருடி ஆடைகள் சுத்தமாக போட வேண்டும் என்று நினைப்பவர்களை நினைத்தால் சிரிப்பு வருகிறது. அப்படி சுத்தமாக ஆடைகள் போட்டு என்ன வெள்ளை மாளிகைக்கு விருந்துக்கா போக போகிறார்கள். வெள்ளை மாளிகையின் வாசலில் நிற்கும் செக்யூரிட்டி   சல்யூட் அடிச்சு உள்ளே கூப்பிடவா போறார். அந்த வேலியோரம் நின்று ஒரு போட்டோ பிடிச்சுட்டு வீட்டுக்கு வரவேண்டியது தான்.

*************************

அந்தரத்தில் காற்சட்டை

சமீபத்தில் ஒருவர் சொன்னார், ஒரு பள்ளியில் பழைய பெல்ட்களை ( இடுப்பு பட்டி - சரியான தமிழா தெரியவில்லை ) தானமாக/இலவசமாக வழங்கும்படி கோரிக்கை வைத்தார்களாம். அதான்பா இந்த டவுசர், காற்சட்டை கீழே விழாமல் உறுதியாக இடுப்புடன் கட்டி வைத்திருக்க பயன்படுமே அதே தான். எனக்குத் தான் காது மந்தமோ என்று நினைத்து அருகில் நின்ற என் தோழியிடம் கேட்டேன். அவரும் என்னைப் போல ஙே ஙே தான். அந்த நபர் சொன்னார், அட! பெல்ட்டேதான், என்று..
சிலரை பார்த்திருப்பீர்கள் பான்ட், டவுசர் இடுப்பில் நிற்காது (saggy pants ). மறைக்க வேண்டிய பாகங்களை மறைக்காமல் எங்கோ அந்தரத்தில் தொங்கி கொண்டிருக்கும். அட என்ன கொடுமை, என்று நாட்டுக்கு வந்த புதிதில் நினைத்திருக்கிறேன்.
அந்த நபர் தொடர்ந்தார், உங்களுக்கு தெரியுமா இந்த பெல்ட் அணியாமல் காற்சட்டை, நீள டவுசர் போடும் பழக்கம் எங்கே தோன்றியது என்று?, கேட்டார்.
இதுக்கெல்லாம் ஒரு வரலாறா? நல்ல டமாஷா இருக்கே, என்று சிரிப்பு வந்தது.
பெல்ட் அணியாமல் பான்ட்(pants) போடும் பழக்கம் முதன் முதலில் தோன்றியது சிறைச்சாலைகளில் தானாம். காரணம்: இந்த பெல்டை  கொழுவி கைதிகள் தற்கொலை செய்யாமல் தடுக்க இந்த ஏற்பாடாம். அது போல ஷூக்களுக்கு லேஸ்களும் வழங்கப்படுவதில்லையாம்.

இந்தப் பழக்கமே பின்நாளில் ஸ்டைல்/பாஷன் என்று உருவாகிவிட்டதாம். இதைக் கடைப்பிடித்து பள்ளிகளுக்கு தொங்கும் பான்ட்ஸுகளுடன் வந்த விடலைகளுக்கு பள்ளி நிர்வாகமே பெல்ட்கள் வழங்க முடிவு செய்துள்ளதாம். நல்ல முடிவு தான். சரி. இதனைப் பார்த்து மக்கள் தங்களிடம் இருக்கும் பழைய பெல்ட்களை கொண்டு போய் கொடுத்தாலும் மாணவர்கள் இதை ஒவ்வொரு நாளும் பள்ளிக்கு அணிந்து வருவார்கள் என்பது எவ்வளவு நிச்சயம். ஒரு பெல்ட் வாங்கி  கொடுக்ககூட முடியாமல் பெற்றோர்கள் இருப்பார்களா? அவர்கள் பெல்ட் வாங்கி கொடுத்து, இவர்கள் கட்டாமல் இப்படி சுத்தினால் யார் என்ன செய்ய முடியும்?  இதென்னவோ வேண்டாத வேலை என்றே எனக்கு படுகிறது.